नेपाल जेनजी फ्रन्टले समाचार कक्षबाटै पत्रकार पक्राउ गरिएको घटनामा प्रधानमन्त्री बालेन्द्र शाह, गृहमन्त्री सुधन गुरूङले राजनीतिक र नैतिक जिम्मेवारी लिनुपर्ने र प्रहरी महानिरीक्षक (आइजिपी) दानबहादुर कार्कीमाथि छानबिन गर्न माग राखेका छन्।
शुक्रबार नेपाल प्रेसका पत्रकार विश्वमणि सुवेदी, डीएनखबरका धिरज बस्नेत र मोटिभेट न्युजका शोभराज बरालसहितका पत्रकारलाई समाचार कक्षबाटै प्रहरीले नियन्त्रणमा लिएको थियो। त्यस्तै, नयाँ पत्रिका र दियो पोस्टका कार्यालयमा पनि सादा पोशाकका प्रहरी पुगेर पत्रकारबारे सोधखोज गरेका थिए।
उक्त घटनाप्रति गम्भीर ध्यानाकर्षण भएको जनाउँदै फ्रन्टका संयोजक रक्षा बमले जारी गरेको विज्ञप्तिमा पक्राउ पुर्जी नदेखाई र पक्राउको कारण नखुलाई समाचार कक्षमै प्रवेश गरेर पत्रकारलाई नियन्त्रणमा लिएको घटनामा छानबिनको माग गरेकी हुन्।
'प्रधानमन्त्रीको सचिवालयले अनभिज्ञता दाबी गर्नुको सट्टा असंवैधानिक पक्राउ र धरपकडमा संलग्न प्रहरी अधिकारी एवम् जिम्मेवार प्रहरी नेतृत्वमाथि आवश्यक छानबिन र कारबाही गरी गृहमन्त्री र प्रधानमन्त्रीले यस घटनाको नैतिक एवम् राजनीतिक जिम्मेवारी लेऊ,' विज्ञप्तिमा भनिएको छ।
अभिव्यक्ति स्वतन्त्रता, पारदर्शिता र जवाफदेही शासनको माग गर्दै भएको जेनजी विद्रोहबाट बनेको सरकारले नै समाचारका विषयमा पत्रकारमाथि धरपकड गर्नु विद्रोहको मर्म र जनादेशविपरीत भएको फ्रन्टको भनाइ छ।
'जेनजी विद्रोहले दिएको सुशासन, जवाफदेहिता र अभिव्यक्ति स्वतन्त्रताको जनादेशका विरुद्ध डर, धम्की र धरपकडको बाटो अपनाउने छुट सरकारलाई छैन,' विज्ञप्तिमा भनिएको छ।
समाचारप्रति असहमति वा उजुरी भए प्रेस काउन्सिल वा अदालत जाने कानुनी प्रक्रिया हुँदाहुँदै 'माथिको आदेश' भन्दै प्रहरी परिचालन गर्नु गुण्डाराजको झल्को दिने अधिनायकवादी प्रवृत्ति भएको फ्रन्टले जनाएको छ।
त्यसैगरी, गृहमन्त्रीलाई संसद र नागरिकप्रति जवाफदेही बनाउन पनि माग गरेको छ।
समाचारको स्रोत पत्ता लगाउने वा विचार तथा अभिव्यक्ति नियन्त्रण गर्ने नाममा विद्युतीय कारोबार ऐनका असंवैधानिक दफा प्रयोग गर्न तत्काल रोक लगाउन र ती दफा खारेज गर्ने प्रक्रिया अघि बढाउन पनि फ्रन्टले माग गरेको छ।
फ्रन्टले अभिव्यक्ति स्वतन्त्रता र संविधानको रक्षाका लागि निरन्तर खबरदारी गर्ने जनाएको छ।
